2019 March 9 zaanlam suimilam 6:00 ah Chin ramkulh Paletwa peng Pyichawng hmunram Pinsu khua thlanglam 5.5 km ih SahKahKha (5) kuthnuai Kuah ih hmunkhuar KahMahYah (563) sakhan, Yayi Biuhakung pakhat cu an la ngah thu Arakhan Army (AA) in March 10 ah an than.

AA ih thuthannak an neih hnu Narinjara news department cun March 11 zaan ah AA speaker Khaing Tuk Kha cu pehparnak a nei ih AA speaker cun hi hmunram ah nithum sung nasazet in do-awknak an neih hnu March 9 zaanlam suimilam 6:00 ah hi hmunpi an lak ngah thu simnak a nei.

“Pinsu khua thlanglam ih um SahKahKha (563) hmainor hmunkhuarnak hmunpi kan lak ngah, cuihmunah do-awknak hi March 9 sundir suimilam 1:00 thok a siih zaanlam suimilam 4:00 tiang do-awknak neih a si, hi hmunah do-awknak nasazet in a um, zaanlam suimilam 2:00 ahcun Myanmar ralkap lam in vanzam pahnih thawn minute 25 sung bomb an thlak, cun Rocket khal in kap, cun meithal thawn khal kah-awk a um, cuti vekin nasazet ih do-awknak neih a si, zaanlam suimilam 6:00 ahcun ziangkim thiangfai thluh in kan tuah” tiah AA speaker in simnak a nei.

Tuițum do-awknak hi 2019 March thla sungah a nasabik mi a siih hriamhrei thilri tampi le ralkap mipum 11 khal kaih ngah an si tiah AA speaker in a sim.

An laksuahmi hriamhrei thilri pawl cu 81 meithal pakhat le bomb fate 14, 60 meithal (mi zohnak tel) pahnih le bomb fate 20, 60 meithal cerek fun 231, RPG – 7 bomb fate 27 le a cerek 13, 9 MA phun meithal 9 le a cerek 2285, PHANTOM phun Drone pahnih, bomb hawlnak cet pawl, computer laptop pawl, penpar-awknak cet tumpi pawl an lak ngah thu a sim bet.

AA ih casuahmi sungah cun Backhoe leinornak motor 16, Toyota motor 1, lungto phur motor 1 pawl tla laksak ngah an si tiah a tarlang.

Hriamhma tuartu hi ralkap lam an tam thu, a hlan khalah do-awknak a um thu, hi hmun ih do-awknak ahhin ralkap lam ih captain pakhat le ralkap 15 an thih thu, cuihnu do-awknak a thlen khalah mithi an um thu, hi kiangkap ahhin nasazet ih nithum sung do-awknak a um thu pawl a sim bet.

“Ralkap mipum 11 kan kai, atu annih cu kan zinzoi rero lai ruangah cipciar in lo sim a theih hrih lo, kan lo sim theimi cu an damțha tihi a si” tiah AA speaker in a sim.

March 9 ih do-awknak ah zohman a thi an um lo thu, hi do-awknak a thlen hlan hmundang ih do-awknak ah AA lam in mi pakhat a thih thu, mi malte in hriamhma an ngah thu” AA speaker Khaing Khaing Tuk Kha in simnak a nei.

AA in Maha Biuhakung pakhat la tahratin hriamhrei thilri pawl zuk thawn tarlang hmansehla hi thuhla thawn pehparin Myanmar acozah ralkap lam in atu tiang sanletnak zianghman a um hrih lo.

Myanmar ralkap thuthang diktak phuannak ih țuanvo neitu le nitlaknak lam hmunpi ih speaker pehpar rero asina’n an phone an phih ruangah ralkap lam ihsin an ngai dan tarlang theih a si lo. Ref : NRJR

 

LEAVE A REPLY

Please enter your comment!
Please enter your name here