Falam khawpi ah IMS-FOJO thawn kawmaw in Falam FM Radio cu areihlan ah suah a si thlang ding thu theih a si. Himi Falam FM suahnak ding hrangah April 25 ihsin May 1 tiang Broadcasting Journalism cu IMS-FOJO in training an pek thu khal theih a si.

Hi Falam FM Radio hrangah hin Falam khawpi ih YCC innpi cu alak rori in hmanter ding a si ih IMS-FOJO hin thilri ṭulsammi pawl le training pawl an pe tiah theih a si. Himi Falam FM Radio tawlrelnak ih ṭuanvo neitu Salai Ngepi cun;

“Rangon ah IMS-FOJO thawn hminkhen kan khen ih, Falam ka tlun tikah Studio hrangih ṭulsammi thilri pawl khal ka phur cih ding. Annih cun amalbik minung 15 tal an kim lawngah thawk theih a si ding tiah an ti. Asinan tu hrih ahcun training kaitu minung 8 lawng an um hrih lai. Curuangah training neih bet ding khalin tawlrel a si. Cet thilripawl bun muangcang thaw cun June thla lamih thawk dingin in tiam, asinan hmai zarh ihsin Falam FM radio awsuah cu thawk thei dingin kan zuam ding.

IMS-FOJO မွ Mr.Peken Christopher George (Photo: Iprd Falam)

Tu hrih ahcun Falam FM radio suahnak ding hmun cu Facebook ah Falam FM tiin Page kan tuah ih cumi ihsin Soundcloud thawn ni khat nazi pakhat sung suah a si ding. Application kan ngah hnu khalah Facebook Page ihsin ngai a thei thotho ding” tiah a sim.

Falam FM radio in a suah dingmi thu pawl cu Thuthang, Mipi Au-aw, Hla, Bezai, Nunthuleng le hmaitawn thusuhnak pawl an si ding.

Falam FM hi Chinram kulh ih AWSUAH nak ummi lakah apathumnak a si. Adang pawl tla cu Tedim pensung ih neihmi Phualva FM, Tedim peng Thuklai khua ih neihmi Heisa FM pawl an si. Zalen.

 

LEAVE A REPLY

Please enter your comment!
Please enter your name here