Chin Standard Bible Lehdan Thuhla Tawi




CHIN STANDARD BIBLE LEHDAN THUHLA TAWI

A Hmin: Kan Falam ṭawng in Bible a um phah rero thlang tikah, Bible hmin kan pek lo ah cun cu paih Bible, kha paih Bible, cuih kawhhran Bible tivekih simawk le kawh a ṭul ding ih, hmin pakhat khat kan pek a ṭul tiah Bible Translation Committee pawl in an ruat. Cutikah a hmin ah ziang Bible kan ti pei tiah kum tawkfáng zet an ruah hnuah, hi Bible hi Greek Scholar-pawl le Hebrew scholar-pawl in ṭawngfáng pakhat hnu pakhat rori ih cek mi a si ih, Chin Writer’s Handbook (Falam Chin Grammar) vekih ngan mi a si fawn, cuihtlunah Bible câng reference siseh, footnote siseh, Bible bettu thupawl khal an um fawn ruangah a standard ve hrimhrim ko tiin, Chin Standard Bible tiih hmin pek a si.

Hi Chin Standard Bible hi Bibles International hohatnak hnuaiih leh mi a si. 2002 ihsin lehlin hna thawh a si ih, 2009 ah Thukham Thar suah a si. Bibles International cu Conservative Bible Society a si ih, Thukham Hlun Hebrew Bible Masoretic le Thukham Thar Textus Receptus/Majority hi rinsantlak a si tiah an zum ih, cumi cu lehlin a si. Kan consultant-pawl in King James Bible kan let ti ṭawngkam hman an duh lo. King James Bible ih an sirhsan mi Greek Bible kan let ti an duh. A ṭawng hrampi Hebrew Bible le Greek Bible parah ṭhumawih an cek tikah mirang Bible vekih leh mi a si lo. Kum 2010 in Thukham Hlun lehlin hna thawk a si lala. Grand Rapids ih International office nei, Bibles International (A Bible Society of Baptist Mid Mission) in Greek Scholar-pawl le Hebrew Scholar-pawl an run thlah ih, kan lehlin mi cu ṭawngfáng pakhat hnu pakhat an cek thluh. Curuangah kum hi zat kan reinak a si. Kum 2017 ah a cek khal ṭheh thluh a si nân, Bible bu vekih suak dingin format a ṭul, rĕm mi tete a um vivo. Cutin 2018 June thla lawngin a sŭtnak ding hmun Korea ram ah kuat thei a si. Read and Review Committee khal in an siar rero ih, ṭawngfáng sual um lo ding rori in siar rero a si ko nân, a sual mi a um thotho ding ti cu a fiang cia. A lettu le a cektu hi milai an si tikah dik thluh a si hrimhrim lo ding ti khal theih cia a si. A ṭha thei bik ding le a dik bik ih leh tum cu a si ko nân, a famkim hrimhrim cuang lo ding. Nan siar tikah ngansual mi ṭawngfáng nan hmuh asile, nan khawl pei ih in sim hramhram leh pei. Neta sŭtsal tikah dikten suak thei hrimhrim dingin saduh kan that.

Jehovah = Mirang Bible tam sawn in cafáng tum hlir in LORD tiih a hman mi cu Mizo Bible in LALPA tiin le Lai Bible um cia mipawl in BAWIPA tiin cafáng tum hlir in an hmang ve. Mirang Bible: Young’s Literal Translation, The Darby Bible cun Jehovah tin an hmang. World English Bible cun YAHWEH tin a hmang. King James Bible khal in Jehovah tiin hmun 7 lai te ah a hmang. Hihi Pathian bulpak hmin rori a si. Israel mipawl in Pathian bulpak hmin hi an sal ngam lo ih, Bible an siar tikah himi Pathian bulpak hmin an hmuh tinten sal ngam loin ‘Bawipa’ tiin an sal ṭheu. A Hebrew awsuah ah cun YAWEH ti hrawnghrang ih awsuah hi a si hmang. An sal dah lo ruangah a awsuah ngaingai khal hi theihfiang taktak a si lo ti a si. Judson in Kawl Bible a leh tikah Eternal God “Htawarah Phaza” tiin a let ve. ‘Kudaw’, ‘takhin’ ti menmen in a let ve lo. Hmun hrekkhat tla ah cun Jehovah ti khal in a hmang. Ṭhimnak ah Jeremiah 33:2 khalah Jehovah tin a hmang. Kan Bible leh mi in ceksaktu Hebrew Scholar-pawl le Greek Scholar-pawl in BAWIPA tiih cafáng tum hlir ih ngan men cun a siartupawl in a sullam an thei lo ding ruangah, a sinak takin hmang uh, ‘Kumkhaw Pathian’ ti maw nan duh “Jehovah” ti maw, ‘Jahweh’ ti maw tiin duh in hrilter tikah ‘Jehovah” ti hi translation team-pawl in an hril ih, cucu consultant-pawl in an nemhnget. Manipuri Bible khalin “Jehovah” tiin an hmang. A Hebrew ṭawngfáng awsuah a nai zet.

Bible Sungih Rawngbawltu Kawhnak Hmin Hrekkhat:

Mirang Bible in Apostle/Apostles tiih a hman mi kha a awsuah thlunin ‘Apostol/Apostolpawl’ tiin kan hmang. Pastor, Evangelist, Prophet tipawl kha a sullam ih let loin, a mirang awsuah le a Greek le a Hebru awsuah  thlunin hman an si ruangah ‘Apostle’ ti khal hi a awsuah vekin kan hman a ṭha tiah ruatin ‘Apostol’ tiin kan hmang.‘Evangelist’ khal evangelist tiin, ‘pastor’ khal pastor tiin, ‘prophet’ khal profet tiin, elder khal elder tiin, ‘Bishop’ khal Bishop tiin, ‘Deacon/Deacons’ ti khal a awsuah thlunin ‘dikhon/dikhonpawl’ tiin kan hmang.

Bible Bu Hmin:

Danglam deuhih kan hman mi bu khat cu Thukham Thar ih “Apostolpawlih Cangvaihnak” ti hi a si. Mirang Bible ah “The Acts of the Apostles” ti a si ih, a sullam rori vekin “Apostolpawlih Cangvaihnak” tiih kan lehnak a si. A Bible sungah le “Apostol” ti hmin ih kan hman fawn ruangah danglam deuh hman sehla, a Bible sungih kan hman vekih kan leh lo ah cun a sung thu thawn a milaw nawn fawn lo ding ruangah “Tirhthlah” tiin simaw, “A Thlah Mipawlih Tuahnak” tiin simaw kan hman lonak săn a si.

Thutlangkawmnak:  Chin Standard Bible lehdan thu a tawi zawngih kan simfiangnak na siarnak in malte tal a thuhla na theihthiam ka zum. Thusuh duh nei in siseh, lungawi thu sim duh in siseh, thapek duhnak nei in siseh, thurawn pek duh in siseh a hnuaiih address ah ca in simaw, email in simaw, telephone in simaw, hmaitawn ih biakawknak in simaw in pehtlai hram uh, kan lung a awi zet ding. Chin Standard Bible na siarnak in Pathian in thu lo sim in, amah thawi naihaw sinsinnak ih lo hruaitu si hram seh.

Website Cahmai ih cohlan lomi tete (cafang) an um ruangah himi Chin Standard Bible Lehdan Thuhla Tawi hi PDF in Full text in siar duhtu hrangah a hnuai ih tarlangmi ihsin na download thei.

Chin Standard Bible Lehdan Thuhla Tawi PDF Download nak

Timothy Sui Lian Mang

Main Translator

Bibles International Myanmar Society

Insein, Yangon

Email: timothymangbims@gmail.com ; Telephone 095103980

 




Be the first to comment

Leave a Reply

Your email address will not be published.


*