Damsan le Damman; Pu Nothankap




Milai pakhat si dingin kan nui pum sung ihsin kan pian veten dam-san nei lo kan um lo. Asinan dam-san nei duh zet nan nei thei lo kan tampi ih a neih ih nei duh lo hrimhrim khal an um. Leitlun ih milai kan pian-san cu midang hrangih nun a si.  Midang hrangih nun kan thiam lo veten kan pian-san cu umze nei lo tlukah a cang. Cuvek nun cu dam-san nei lo nun a siih dam-san nei lo nun cu dam-man um lo nun a si.

Kan neih cio mi dam-san a bangaw lo. Mipa hmanah innsang pakhat din thei cin pawlih dam-san cu an nupi le fate an siih, innsang nei thei cin nunau hrang khalah an dam-san cu an pasal le fate an si. Himi si lo mai unau pianpi le mai sungkhat pawl dam-san ih nei khal an um. Nupi le fate siseh, pasal le fate siseh, unau pianpi siseh, sung le khat siseh,_ dam-san ih neitupawl cu milai tam sawn kan si. Asinan, miphun le khua le ram dam-san ih nei an umih cuvek cu mi malte an si. Thimnakah, Vietnam ram dintu Ho Chi Mynt cun a thih tiang nupi fate khal a nei lo, leitlunih a dam-san cu Vietnam ram le mipi  an si. Jesu Khrih in a nunnak tiang pein hi leitlun ih a rung dam-san cu leitlun milai zate kan si. (Zumtu pakhatin Pathian hnatuan cu a damsan a si kan ti khalle  hna a va tuannak ding cu milai an si thotho.)

Milai in kan dam-san a tam poh le dam-man kan nei deuhdeuh. Dam-san a mal poh le dam-man kan nei lo deuhdeuh. Dam-san an tam tikah duhtu le lainattu an tam sinsin. Khatlamah dam-san nei duh lo hrimhrim an umih cuipawl cun leitlunah dam-man an nei lo. Cuvekpawl cu zangfah umbik an si. Ziangahtile milai cu mahte um thei a si lo, um dingih piang khal a si lo. Curuangah milai pakhatin, a mai hrang lawngah nungin a ruatawkih mahte umih umin midang hrangah ziang hman khawruah mi le tuah mi a nei lo a sile, anih cu leitlun ih a pian san thei lotu a si. Ngan zo bangin leitlun ih milai kan pian san cu midang hrangih nun a si.

Mahte si loin midang thawn um tlang dingih sersiam kan si hrimhrim ruangah, kan minungpi midang thawn pehtlaihnak le laicinnak ziangvek tal si maw neih tengteng a tul. Pehtlaihnak ha kan neih asile cui laicinnak ṭha kan neih mi in nun-man in neiter sinsin ih pehtlaihnak ha lo in nun-man in neiter lo sinsin.

Laicinnak ṭha midang thawn kan neih tik lawngah midang hrangah umze nei le man nei zet thil ṭuansuah theinak lamzin a awngaw theu. Thimnakah ram uktu si dingin rammi thawn laicinnak ṭha kan neih hmaisak hnu lawngah anmah uktu sinak kan ngah thei dingih cutin uktu kan si hnu lawngah an hrangah thil ṭha tuah theinak can ṭha khal kan nei ding, kan tuah duh mi khal a takin kan tuah thei ding.

 




Be the first to comment

Leave a Reply

Your email address will not be published.


*