Tuluk cozah, amahte lawng hmanin tuah a rak tum mi 5G network cu tu-ah hin Europe ram pawl khalin tuah an tum ve rero. Hi ti 5G network tuah an tum rero laiah US cozah cun ram himnak hrangih thil ṭul a si ruangah China Telecom, Huawei thilri pawl lakih ralring tei um dingin a forhfial sal hai.

US cozah thawi’ ram himnak ding thuhla pawl pe-aw ṭheutu, Europe ramih rualpi pawl hnenah, a ṭihnung zetmi Huawei company thilri pawl hmang lo dingin felfai ten ka rel zo, tiah US State Secretary Mike Pompeo cun a rel. Hi hi Sunday ni ah, the Netherlands khawpi The Hague ah Foreign Secretary Stef Blok thawi an biakawknak ih a relmi a si.

Tuluk hi an rak thiam zet ko. Tu naiah Dutch intelligent pawlin Huawei company software pawl an thlingthla ih, a thup teih an timi, a hmangtu pawl an theihter duhlo mi a um ko, ti an hmu. Cuvek thuhla a hung than lai tak a si ruangah US State Secy kha hin ralring dingin a cah hai a si bik.

Khat lamah cun, Huawei neitu, an CEO Ren Zhengfei cun Huawei hmangtu pawlih an personal thil zianghman midang hnenih pek le theihter a si lo thu le, an company hi Tuluk cozah khalin a uk lo thu a rel ve. Mike Pompeo ih rel vek a si lo, Huawei hi Tuluk cozah thawn hna kan ṭuantlang lo hrim hrim, a ti.

Netherlands cozah lam khalin US le a rualpi pawl thawi’ hna ṭuan tlan an duh thu a rel ve. An ramin 5G network an tuah rero lai ah hin an ram himnak ding cu anmah a ram neitu roriin an tawlrel ko ding, tiah Foreign Secretary Bloc cun a ti.

 

LEAVE A REPLY

Please enter your comment!
Please enter your name here