1. Israel Hrilawknak ah Benjamin Netanyahu Nehnak Co
#Israel hrilawknak cu April 9 ni ah neih a si ih PM tuan lai Benjamin Netanyahu le a tanrualpi party pawlin Israel Tluangsuakbu Knesset ah nehnak an co ruanagah Benjamin Netanyahu khal cu term 5 nak PM tuan dingin acozah a tuah ding a si. Israel Tluangsuakbu Knesset ah him tlangsuak palai 120 an um. Netanyahu ih party Likud hin tokham 35 an ngah ih an rualpi party pawl thawn Right Bloc hin tohkham 65 an ngah ding a si.

Khatlam ah Israel ralbawibik Gantz ih Blue and White party cun tohkham 35 an la ve nan an rualpi Left Wings pawl thawn tohkham 55 lawng an ngah ruangah an sung tinak a si. Mr. Gantz hin TV Chanel 13 ih mipi ngaidan a rel cu pawmin nehnak co ah a rak ruataw ih Israel mipi hnenah nehnak thucah le lungawithusimnak a rak nei man lo ziang! Tu cu an duai pawmin an suak fel zo.

Benjamin Netanyahu hi Nationalist Hardliner an ti tak Israel hrang ding khawng ememtu a si ih US President Trump thawn hawipi tha an si ruangah Democrats President Candidates pawlin an phawm ciamco. Beto Orouke lephei cun ‘hnam thliartu, hnam filing neitu a ti. (Nitlaknak ram lamah cun ‘racist’ an tiawk hi namtlakawknak thabik a si. Racist tiih an ruah mi hi cun mipi awfis ah hna an ngah thei dah lo hleiah Artist pawl khal an tlaksiat phat theu). Asinan anih hi Russian President Putin, India PM Modi le Japan PM Abe pawl khalih an upat zet mi a si. Benjamin Natanyahu hin nehnak a co cun Gaza tipi kap, Palestine-pawl umnak cu luhhnawh a tum thu a rel. Hi hi 1993 Oslo Agreement pahbalnak a si tiin leiltun ramhruaitu tampi in an sawisel.

Hiti Bibi (Israel pawl kawh dan) in nehnak a conak san tumpi pakhat cu Trump in Jerusalem cu Israel khawpi ih a pawmpi le Galilee nisuahnak tlangtluan Golen Heights cu Israel ramih a pawm ruangah a tel. Cun Russian President Putin khalin kum 37 liam zo, Libenon ral ih Israel ralkap thipawl ruh a pek ruang khalah mipi duh a hlawh phah a si. Cun Israel cimih tumtu Iran ralkap cu US acozah in Israel hrilawk ding ni ah ‘tha hrum thawh pawl'(terrorists) tiih an phuan khal hin Vawrhlam phuaih hrang an hlawkpi ti a si.
#Hitin Bibi cu Israel PM tuan reibik a si dingih eithup puhnak pawl ihsin khal a talsuah thei phah ding. German tihnuai lawng lei thu ah eithupnak neiah puh a si. Israel hi Middle East ah ram zalen um sun a si ruangah anmah khal an doaw cece ve a si.

2. US Boruak
Trump Campaign cu Russia in a tanpi maw timi zingzawi (Investigate) ding ah Robert Mueller kha tuanvo pek a si ih kum 2 sung zingzawi in mi 500 lenglo thusuhnak a neih hnu ah Trump cun sualnak a nei lo tiin March 24 khan Attorney General William Barr hnenah report a pe a si kha. America ih danthiam hleice mi 18 in kum hnih an zingzawi ih an hmuh lo kha Democratic hruaitu hrekkhat cu, “Robert Mueller in a sualnak hmu lo khal sehla a sual ti kan thei” ti vek, “Hi thu ah sualnak nei lo khal sehla kan hlawn thotho ding” tivek an tawng ciamco.

Trump duhnak khal a pung deuhdeuh. Ramusseum in mipi ngaidan a laknak ah cun duhtu 54% duhlotu 44% a si. CNN ih tuah mi ah cun a sang thei cuang lo. Russia bawmnak ruangah Trump a tling timi Media pawlih an au ruangah Trump Job Approval rate hi 40% kiangkap ah a um ring ring. Tu cu hi thuphan thu a suahtertu lam cu ziangzawi ve dingin AG William Barr a timlamaw tiin thuthang a suak.

Democratic lam cun tawka hur(Gay) Candidate an nei. Pete Buttigieg , kum 37, Indiana ramkulh South Bend khawpi uktu cun President a cuh thu theih a si. Tu ah cun America ah Gay President neih pawi tilotu 71% an um zo ti a si. Tu hi a boruak a tha vivo ih Democratic Candidate 18 lakah a pathumnak a hung tling so zo. Vice President Mike Pence cu Khristian tha tak neih bangaw neihawk pawmlotu a si ih Buttigieg cun, “Mike in ka sinak ah lungkimlonak a neih a si le in sersiamtu thawn el-aw hai she” a ti. Nitlaknak rampawlin an tisual theu cu Pathian in hitin in sersiam an ti theu, ngaingai cun Pathian cun mi pangngaiin a sersiam nan hursualnak ah anmahte an lut sawn mi a si.

Texas ihsin Senator Ted Cruz cun Facebook le Twitter CEO pawl cu Senate Committee ah a kawk hai nasa. A san cu hipawl hin LGBTQ dodalnak le zumlonak cu ‘huatnak tawngkam’ Facebook le Twitter ihsin an hlawn theu ruangah a si. Cuhleiah pumsung naute thah duhlonak lam khal an rak dirtla theu. Cun Conservative le Republican lam account phihsak tla an rak nei theu. Hipawl ruangah kawh an si ih na takih kawk an si.

Awle ngan ding a tam tuk nan hivial hin kan duhtawk hrih ding. Hmai zarh ah tawnawk sal kan tum ding.
Photo: Trump & Bibi.. Jed Zuala Cawnghlut ih Post mi laksawngmi a si.

 

LEAVE A REPLY

Please enter your comment!
Please enter your name here