Ka Pa Chinram, Ka Nu Falam; Pu Nothankap




Ka hlan ih Falam hotu le hruaitu pawl ih hnaṭuan ka hmuhdan malte ka ngan hmaisa ding.

Chinram ah Falam peng suak upa, ṭhimnakah Pu Ṭuang Hmung, Pu Lal Bik, Pu Siah Luai, Pu Sum Mang le  Pu Za Hre Lian (Minister) pawl hi anmah le san ah mi hmaisa upa hnatuan sang bikpawl ti theih an si. An hnaṭuandan zoh tikah ziangtik hmanah an suahnak Falam hrang lawngah an ṭuan dah lo, Falam cu hmaisabikah retin ṭhansohnak phunkim an tuah lo. An zoh mi cu Chinram pumpi hrang a si.

Ziang tiang Chinram pumpi hrangah an ruat hmaisa tile thimnakah Pu Sum Mang (State Education Officer) le Pu Za Hre Lian ih suahnak khua Tlauhmun ah anmai san ah Middle School hman an ret lo, Pu Siah Luai (State Education Officer) ih khua Tlaisun khalah Middle School ret cu sim lo tui ni tiangin phun li tlawng fang lawng a um.  Ngaingai ahcun hipawl hi an tuah thei tuk mi a si.

Hivek lungput an nei hi ṭha ka ti, ropi khal ka ti. Asinan keimai nun ih ka tawn mi ihsin ka zoh sal tikah, in cawmtu, in tungdingtu kan suahkehnak khua le ram le peng tanta tiang in ram pumpi hrang ṭuan hmaisak sawn ti mi cu mai suahnak nu tanta in nudang (nu ei) tuamhlawm vek a si.  Mai peng hrang thei tawk ṭuan hnuah peng dang le Chinram pumpi hrang ṭuan, lole a rualin zaran ten zoh ih ṭuan tlang hi kan khua le ram damnak sawn a rak si.

A dik, Chinram pumpi hrang ṭuan ding, cu lawng hman si lo Kawlram pumpi hrang tiang hman ṭuan ding. Hmansehla mai piannak khua le ram tanta tiangih rampi hrangih ṭuan ti cu mai khua le ram sunnak a si, ziangahtile peng dang le hnam dang in kanmai lungput vek nei in anmai khua le ram tanta in kan khua le ram hrangih an ṭuan ve lo tla ahcun kan cem. A ngaingai khalah cuvek thinlung nei peng dang hmuh ding an um hrih lo ruangah, kan cem.

Kan Chinram le Falam peng thuanthu tawite zoh tikah, Falam pawlin khawruahnak kaupi kan neih mi le mi iksik nei loin nunṭha zetih kan um hin kan peng hrangah rah ṭha hnakin rah sia a rah sawn ringring. Sim le rel tlak a si lo nan keimai nun ih ka tawn mi malte ka ngan ding.

 




Be the first to comment

Leave a Reply

Your email address will not be published.


*