Myanmar ramah pawngsual a tam sinsin




2018 kum sung ahhin kumkim lo nauhak siseh, kum kim nunau siseh pawngsualnak 2000 hrawng hi thuțhennak zung ah an thuhla relsak a siih cumi pawl sungah kumkim lo nauhak an tam sawn thu ramdinkhawm thuțhen tlanghmun lubik (ျပည္ေထာင္စု တရားလြတ္ေတာ္ခ်ဳပ္) ih tlangthannak bangtukin theih a si.

Ramdinkhawm thuțhen tlanghmun lubik ih tlangthannak ahhin a tumbikmi sualnak ti’n a tarlang ih kumkim lo nauhak pawngsual hi vei 1120 a um ih kumkim nunau pawngsualnak hi vei 802 an um tiah a tarlang.

Himi hi pengpi le peng thuțhennak zung ih thurelsak mi an siih thah-awknak thubuai hi vei 1339, rittheihsii thubuai vei 12417, minung zuar thubuai vei 179 le accident ih thihnak thubuai vei 3294 an si.

Kumkim lo nauhak pawngsual thubuai tambiknak hi Yangon ramțhen a siih vei 253 a um, a pahnihnak ah Mandalay ramțhen a siih vei 172, a pathumnak ahhin Irrawaddy ramțhen a siih vei 146 le a palinak ahcun Sagaing ramțhen a siih vei 114 a um.

Kumkim nunau pawngsualnak thubuai cu Irrawaddy ramțhen ah a tambik ih vei 127 a um. A pahnihnak ah Pago ramțhen a siih vei 123, a pathumnak ahhin Mandalay ramțhen a siih vei 121, Yangon ramțhen ahcun vei 102 le Sagaing ramțhen ah 74 a um.

Thah-awknak lam ahhin Yangon ramțhen ah vei 204, Mandalay ramțhen ah vei 168, Irrawaddy ramțhen ah 156 le Pago ramțhen ah 147 a um.

Rittheihsii thubuai ahcun Shan ramkulh ah vei 2626, Kachin ramkulh ah 2370, Sagaing ramțhen ah vei 2015 le Yangon ramțhen ah vei 1856 a um. Himi pawl hi ramdinkhawm thuțhen tlanghmun lubik ihsin thubuai tambiknak hmun an tarlangmi pawl an si. Ref : DVB

 




Be the first to comment

Leave a Reply

Your email address will not be published.


*