NAUHAK LAI IH TAKSA ṬULMI EI NGAH LE ZIRHNAK ṬHA DAWN NGAH




Ram pakhat cozah in an ram sungih tualleng tlawngah an rampi in hmun thupi an neih mi pawl rak siatsuah saktu hi cumi ram an si, tiah an zirh. An rampi ih palhnak le mawhnak hnakin ram dang mawhthluknak cu nasa deuh in an rel uar. Tualleng tlawng ihsin phunsang tlawng tiangih an zir vivo ruangah tlawngta nauhak thinlung ah cui ram huatnat cu nathrik bangin a um ringring.

Nauhak hrangah nitin ih an theih mi hi a thupi ngaingai. Bible sungih thuanthu nung, miphun thuanthu, innsang thuanthu le leitlun ṭhansohnak thuhla pawl hi awnnak lam nei ih kan sim daandaan in an thinlung sungah a nung ringring ding a si. Nitin hna ih an theih mi, an hmuh mi pawl in a tam le mal in an nun a thunun (control). Cuih ruangah an rualpi kom mi, an hmanmi thilri pawl hi daithlang sak ding an si lo. Nauhak dinhmun ihsi pitling lam pan vivo kan si ruangah nauhak lai ihsi kan zirh awk daan a dik lo asile a poisau vivo ding.

Tuih hlan singapore ram rak hruaitu Lee Kuan Yew in an rampi hmailam thu a ruah tuk ruangah hitin a rak sim “phunsang tlawng ṭheh veve ṭhit awk ding” a rak ti. Cathiam veve, mithiam veve, tlawng ṭheh veve neih awk ding, a ti duhnak a si. Cuih lai ahcun thleidaan awknak tiin an rak hmusual ko ding. Asinan, an ram le an tesinfa pawl dinhmun ding a hmuh cia ruangih a simmi a si sawn. Cathiam nupa cun cathiam faate neih cu a ol deuh cingcing ding a si. Cucu an ram le miphun ṭhansohnak ding karbak khal a si fawn.

Kannih Chin miphun khal kum reipi sung miphun dang ukbehnak hnuai ih um kan si ruangah fimthiamnak ih thiltitheinak le huham cahnak kan tep taktak lo. Fimzir hnakin kan pumpi hrang hnaṭuan a ṭul sawn ruangah fimzir ṭhatnak cu a thu lawng in kan rel ruri ṭheu. Rah ṭha suah thei tiangih fimzir kan mal. Cuih ruangah kan fanau pawl in an nauhak lai ihsin ca an ngainat ding hi nu le pa ih ṭuanvo a si. Thaap awk nak sang zet thawn kan fanau pawl hi kan ngaihsak sinsin a ṭul. A hramthoknak, a foundation a hnget lo, a dik lo asile kanmah bangin rah ṭha an run suah thei zik lo.

Nauhak lai ih taksa ṭulmi ei ngah, nauhak lai ih zirhnak ṭha dawn ngah hi kan nun lamtluan hrangah a thupi ngaingai mi a si. A caan lai ih kan ei ngah lo, kan zir ngah lo, kan thei ngah lo asile kan sinak ding ban lo in kan um lanta thei a si. James Pek

 




Be the first to comment

Leave a Reply

Your email address will not be published.


*