Ralkap Ruangah Khuami 5 Thi Lala, Hriamhma Tuar An Tam




Rakhine ramkulh Butițawng peng Siițawng khawsung ah Myanmar ralkap cun March 21 zaan ah nasazet ih bomb le meithal an kahnak ruangah khuami mipum 5 an thi, mi 20 lenglo hriamhma an tuar ih mi 400 lenglo in himnak hawlin an khua an suahsan tiah theih a si.

Thihnak tongtu pawl cu Myat Shwe Thein (kum 21), U Maung Aye Htun (kum 50), Daw Than Nyunt (kum 49), Aung Than Htay (kum 16) le U Maung Ba Nyunt ih nu (kum 79) an si.

Thihnak tongtu pawl hmutu khuami pakhat in “U Maung Aye Htun le Daw Than Nyunt tei nupa, Myat Shwe Thein le Aung Than Htay an thih kan hmu, U Maung Ba Nyunt ih nu cu anmah inn ah a thi tiah kan thei, Myanmar ralkap pawlih kahmi an si, mani zaanlam suimilam 7:00 hrawngah khawsung ahcun bomb le meithal pawl an kap, zaan var rori an kap, khawsung mi tampi hriamhma an tuar” tiah simnak a nei.

Siițițawng khua beunak hmun ih thlengtu Siițawng khuami pakhat in “do-awknak zianghman a um lo, Myanmar ralkap pawlih kahmi a si, bomb a kap ih meithal khal an kap, bomb khur ih ta meithal in an kap, khuami 5 an thi, nunau 2, mipa 3 an si, bomb khur pakhat sung rori ah mi 4 an thi, nupa le unau an si, khua ih nitlaknak lam ih um pitar a hmin ka hngilh, Maung Ba Nyunt ih nu a si, annih cu bomb khur sungah a relh lo, inn fatakte ih um a siih cui a umnak inn ta cu an kap that, hriamhma tuartu hi mi 20 lenglo an si, minung 3 cu thlaphan an um zet, atu Sittwe ah an fehpi” tiah a sim.

Hitiih meithal kahnak ruangah Siițawng, Sabatha le Kanpin khua ihsin Siițițawng khua ah beunak hawlin mipum 400 lenglo an thlen thu Siițițawng khua hotu U Kyaw Than in simnak a nei.

“Siițawng ihsin innsang 45 an thleng, Sabatha ihsin innsang 8 an thlengsal, Kanpin ihsin innsang 24 hrawng atu an ra thleng, minung 400 luan hrawng an si ding, Siițițawng khua ah himnak hawlin an ra thleng” tiah U Kyaw Than cun a sim.

Ralkap thuthang dik phuannak zung ih sungțuan Bohmuchuk Zaw Min Htun cun “hi thilthlennak hi Siițawng khua thlanglam ah a si, cui zaan ahcun a si, zaan suimilam 9:00 – 11:00 karlak ahcun Yisuchawng le Siițawng khua karlak ah do-awknak a um, do-awknak ih hriamhma tuartu pawl cu kannih lam khalin kan sim thei hrih lo, AA lam thazang hi za lenglo an si ding tiah kan ruat, ralkap lam ihsin cun khuami pawl kap rero timi cu a um lo” tiah a sim.

Nitlaknak lam ralkap hmunpi ih speaker Colonel Win Zaw Oo cun “ralkap in thuhla um loin kap timi a um lo, khawsung lam ihsin AA in an kap ruangah kap kir mi a si, Siițawng khawsung ihsin lungchungzi kan retmi an kap, curuangah an kap kir, kanmah lam khalah hriamhma tuartu an um” tiah a sim.

AA lam ih thuphuangtu Khaing Tuh Kha cun “do-awknak zianghman a um lo, a um lo hokhaw, do-awknak a um lo lawlaw, Myanmar ralkap pawlin misenpi cu hringhran in an kap mi a si, khawsung lut in inn rori ah an va kap mi khi, hi rori si ralkap ih sual dan tawp khawk le rapthlak zia hi” tiah a sim.

Myanmar ralkap in March 16 le March 18 ih Mrauk Oo khawsung an kah ciamco țum ah khuami 10 lenglo an rak thi. Ref : VOA, NRJR

 




Be the first to comment

Leave a Reply

Your email address will not be published.


*