Rev. Nung Kam ih Thuanthu tawi lawrkhawm




“Lairam Deirel Arsi” tin mi in an thei bik ih amah khalin “Lairam Deirel Arsi” a ti aw ve. Lairam Delrel Arsi a si taktak a si. Rev. Nung Kam ih hlan ah anih tlukin Pathian rundamnak maksak rak sim ih hmuntin ih fehsuak an rak umlo tluk a si. Curuangah “Lairam Deirel Arsi” cu a si hrimhrim ih Lairam Deirel Arsi ti ih kawh ding a phu hrimhrim a si. Lairam Deirel Arsi a ti-awknak san cu Pathian ih rundamnak thu Lairam ah Cabu thawn thlengtertu hmaisabik a rak si.

Tum khat cu Darteti khua jubilee ah sermon nak can an pe, hitin duhsak zetin a sim; “kan sualnak hmuahhmuah cu Lal Jesu in thinglamtah ah a theh thluh zo, Mirang in “It’s finished”, Mizo in “A kin ta”, nan fiang dukdo maw?, Halleluiah Praise the Lord, hoh keh, ti awu,” tiin pulpit par cun nasa takin Pathian thu a sim.

Cabu zuar in a suk a so ih a tlawnvah lai ah vawi khat cu Tio tilian in a fen ih Tio tilian lak ahcun “Ka duhbik mi Hma Ngaih Nu ka then ni, Jesu ka tawn ni” ti ih amahte zohman kiangkap ah minung bawmtu umlo ih a au rero lai ah voilekhat ah tikap ah ti in a hlon ih cutin nungdam in a suak thei sal. “Ka cabu zuar hmuah a tlai thla thluh” tiah amahte a phun hmurhmo rero men.

Cawlhni zing sungkua khawmnak an nei ih, Pathian thu a sim hlante ah thla a cam ta, a thlacam cu Amen tuah lo in sermon ah a peh lan, cule a tu le fa pawlin ka pu teh Amen tuah ta loih na sermon lan, kan mit kan rak sing ringring a si si an ti. Pu Nung Kam cun, “Ai cuti maw si, cuti asile ra sal uh Amen kan tuah sal ding” a ti hai..

Pathian thaw hin rualpi vek le unau vek rori ih tlang tlaang an si, Pathian a hniksak dan cu hitin a si, vawi khat cu “Pathian na um asile ka ke i cekter aw, Cu lole na um lo ka lo ti pang ding” tin a Pathian cu a hun bia, cui’hnu reilote ah a ke cu a cek ngaingai. Cutivekin Pathian hi a phunphun in a rak hniksak, Biak tlak le rian tlak Pathian a si ti a theihfeng hnu cun leitlun minung in an kham thei nawn lo, a thih ni tiang Pathian hrang rinum in A hna a tuan a si.

Zing khat cu Falam ihsin Tahan lam feh a tum ih a to dingmi Bus kha Hakha lam feh ding a si ih, khui tawk feh ding ti khal sut le zoh cuang loin a lut lawk mei, cutin an feh vivo ih lamlak an thlen ah a Bus to mi cu Tahan lam ih feh si loin Hakha lam a si ti a thei suak. Asinan “Hakha khal ah pawihai ka nei thotho, a poi lo” a ti ih cutin Halkha tiang a to tlang lawlaw.

Rev. Nung Kam hi, ziangkim hi Pathian remruat an si thluh tiih pawm hnget zettu khal a si. Cabu phunphun khal kan ram sungah phurlut le ramsung ta ram dangih phursuaktu a si. “Nan tangka ah sandamnak a um lo, cabu sawn ah sandamnak thutak a um sawn a si” ti ah Laimi Cabu leinak cang thiamlo pawl tla a rak sim rerotu a si.

Tum khat leh cu rawngbawltu minung pahnih rawl ei a sawm hai, bazar ah sa a lei, a va tlungih an venghnen tei’ inn ah a sa leimi cu a va ret. Rawl ei a cut tikah innteknu cun na mikhual rawl ei sawm teh rawlhmeh tla timlam lo I a ti, cu hnu lawngah bazar ih a sa leimi mi dang inn ah a ret ti a thei-aw sal. A mikhual rawl ei sawm mipawl cu rawldawr ah a eipi hai, ngel cel ah paisa a ken hngilh velvo. Rawl an ei theh in a rawl ei sawm mi pahnih cu, nang rawlhmeh man kuan awla nang buh le thingpi man pawl kuan aw a ti ih an kuan dingmi a zem fingfing hai.

Rev. Nung Kam ih tawngkam hminsin tlak tampi sung ihsin pakhat, “Pathian hnen ah ‘Bawipa, In pe Aw, in pe aw’ tin thil dil nawn hlah uh. Pathian in Neihmi a nei nawn lo. A neihsun fapa rori hman ui lo in kan mah in duhdawttuk ruangah in pe zo (John 3:16). A neihsun fapa in pekmi (Jesuh) rak zum/rin men ding. Cule A hnen ah lungawi thu sim ding, Cuvial, nan fiang dukdo maw,”

Rev. Nung Kam hi Pathian a rinsan zia le a tawngkam cu kan Laimi lakih kan rinsan mi Dr. Timothy Sui Lian Mang cun hitin a sim,

“REV. NUNG KAM THAWI THLA KAN CAMTLANG NETABIK KHA KA HNGILH THEI LO

Rev. Nung Kam thaw hin 1984 ihsin kawmawk kan thawk ih, duhdawaw zetin kan kawmaw vivo. Pyin O Lwin ih kan um lai khalah in ra tlawng ṭheu. Kum 2000 ihsin Rangoon ah kan ṭhawn ih, kum tin in rung tlawng ringring. Tsunami in nasazetin ram ziang mawzat a siatsuah ṭum fang khalah khan Rangoon kan inn sungih a dailen laifang a si ih, inn a hnin natsat tuk tikah inn lengah kan suak ṭheh. Anih cu ziangkhal thei loin dailennak pindan sungah a um rero men. Leng a suah tikah kan sim ih, “Ekinn ihsin vanram ka feh zik si maw!” a ti ih kan hni rero.

Pathian hnenih in fehsan hlante ah khan Rangoon a rung tlawng ih, kan Bible College ih ka office ah kan hung lut. Pu Sui, thla ka lo camsak ta ding a ti ih thla a cam. A thlacam netnak ah, “Pa Pathian, Fapa Pathian, Thlarau Thianghlim Pathian, nan pafa thum in Pu Sui hi thlawsuah pe uh,” Amen tiah a ti. Ka hnih a suak tuk ih, thla kan cam ṭheh veten, “Pathian tla pafa thum na ti men ih,” tiah ka ti. Anih in, “E, Fapa kha Pa hnen ihsi ra a si ih, Thlarau Thianghlim khal Pa hnen ihsin a ra tiah Jesu in a ti kha! Pafa thum ka ti hai mai lo ziang..hahahaha,” a ti ih, hniphahin lengah kan suak.

Leng kan suahphah ah amah in, “Pathian tla pafa thum ti thei tete, khawvel pumpi ah Rev. Nung Kam siarlo va um hlah hai maw!!” a ti ih kan pahnih cun hniphah rero le fakawphah rero in kan inn lamah kan tin.

Pu Nung Kam hi cun Pathian cu nel zetin a be rori a si. Pu Nung Kam hi ka va ngai tak em!! A thuanthu ngan dingin timlam rero a si.”

Hminsin: LAIRAM DEIREL ARSI Rev. Nung Kam hngilhlonak ah tiin The Chin Times ih a suahmi a si.

 




Be the first to comment

Leave a Reply

Your email address will not be published.


*