Kaya ramkulh Shiataw peng sungih Tarida khua Christian biakinn cu ramri le tlangpar miphun thansonak lam zung in million 106 lenglo bomnak thawn a sak sak tiah theih a si.

Kan dung kum ah Kaya ramkulh acozah upa hrekkhat le tlangsuak palai pawl Tarida khua an feh lai ah pastor cun thuhla a thunlut ih cumi ihsin bomnak pawl an ngah thu Tarida khua pastor Moe Jet in simnak a nei.

“Miphun tlangsuak palai U Aung Kyaw Soe, ramkulh acozah upa U Ți cu Tarida khua ah ra in ziangmi lo bom nan duh tiah in sut, kei in biakinn ka ti, hi khua in an sak thei lo, lo hnațuan an si, biakinn sak dingah an tlin lo ka ti, cutikah annih in cuti asile hngak hrih uh, Naypyitaw ih tlanghmun (hluttaw) thurelnak ih feh phah ah Nah-Tah-Lah tlangbawi kan tong hnik ding in ti, thla 7, 8 a rei hnuah nan ngah in ti, Tarida khua to dan le thuanthu pawl kan thunlut, kan thunlut hi kumkhat hrawng a rei, atu ahcun 2018 – 2019 budget sungah a um” tiah Pastor Moe Jet cun simnak a nei.

Rampi ihsin budget tuah ih biakinn saksak thuhla thawn pehparin Pastor Moe Jet in “himi cu ramkhel thawn zianghman a pehpar lo, biaknak hi a si ko, mi hrekkhat cu an mang a bang, rampi in biaknak biakinn a saksak, hi zatzat ting thawngtel in bomnak a pe tiah an mangbang, asina’n kannih Tarida khua dinhmun hi caan khat lai ih buainak nasatak (ျဖတ္ေလးျဖတ္) a thlen ah kan neih zaten kan suahsan, kan inn pawl an ur țheh, cui ramkhel dinhmun ruangah si ko ding kan zum hiti ih bomnak in peknak cu” tiah a sim.

Tarida khua biakinn le hmuan hrangah ramri le tlangpar miphun thansonak lam zung in Kaya ramkulh thansonak lam zung ih 2018 – 2019 budget ah million 106.596 bawm in Royal Country Development company in tender ngah in a tuansak tiah theih a si.

Kaya National Progressive Party (KNPP) in ramkulh level kah daihnak a tuah hnu Kaya ramkulh ah do-awknak a um nawn loih atu ahcun thansonak an tuan rero.

Tarida khua hi tlangpar ram a si vekin Thailand ramri thawn khal a nai-awk ruangah tlangparmi pawlih thansonak hrangah Nah-Tah-Lah in bom theinak a nei tiah tlanghmun (hluttaw) țuanvo neitu pakhat in a sim.

Tarida khua cu Shiataw peng sungih um a siih Kaya miphun pawl umnak khua a si vekin tlanglak loram thlo in pum cawm aw mi an si. An khua hi inn 80 hrawng an siih Christian biaknak le Țun-khan-daing biaknak zumtu tin khua khat ah rualrem ten ummi an si. Ref : DVB

 

LEAVE A REPLY

Please enter your comment!
Please enter your name here