Thang Tin Lian Memorial Hall Sak Ding Thu le Lailun ah Chin National Museum Sak Ding Thu




Lairawn Tahan ah Chin Pawlpi pawlih hona le tawlrelnak in Thang Tin Lian Memorial Hall (Indoor Stadium) sak a si ding thu theih a si. Hi Stadium saknak ding ah hin budget estimate ting 5,000 hrawng a cem ding tiah thuthang kan thei. Stadium hi duhthusam takih kau zetin sak dingih beisei a si vekin a hmunram khal ekah 2 lai ih kau hmunram a la ding tiah theih a si.

Hi Stadium saknak dingih huaihawt ih tawlreltu hi Chin Pawlpi an si ih 2022 hlan ih ṭhehsuak thei ding khalin an tum thu theih a si. Chin miphun mipum tambiknak Tahan ah atu vekin Indoor Stadium duhthusam zet a um thei ding cu lungawiza ngaingai a si.

Himi Stadium sak dingin Chin Pawlpi in an tumtah bikmi cu; Puai nikhua, Concert, Chin National Day tivek le Khawmpi tipawl ah Tahan sehvel ah hin duhthusam zetin Hall hman ding a um lo ruangah kan milesa in duhtawkih kan hman thei dingmi duhthusam Hall a si dingin,

Hivek puai nikhua, pumkhawmawk can kan neih tikah hmun khatih pumkhawmawknak hall pi kan neih lo tikah kan milesa in harsatnak kan neih ṭheu ruangah kan harsatnak sukiang dingin. Cun, Central Chin Pawlpi in fund a nei theinak ding hrang ruahsannak thawn, tipawl an si.

Hi Thang Tin Lian Memorial Hall cu hmunram ekah hnih hrawngih kau a si dingih innpi hin ekah khat hrawng a luah dingih ekah khat cu Mawtaw le motorbike pawl parking nak hrangih ruahhman a si. Innpi ih sir veve ah office khal a um cih dingih meeting nak pindan khal umcih ding a si.

Stadium Hall pi sungah hin minung 2,500 ihsin 3,500 karlak tlem dingih kaupi ih sak tum a si. Cun Stadium sungah lehnak a phunphun pawl khal a um cih dingih, Volleyball, pinpong, arhmul thawinak, chinlung leknak tipawl a umcih thluh ding a si.

Culawng siloin Hall pi sungah hin zun in le thiar awknak khal a um cih ding. Himi Thang Tin Lian Memorial Hall pi Lairawn Tahan ih a um ding cu duhthusam zet a si. Chin National Day, Khawmpi tivek le Ni sunglawi minung tampi tawnkhawm ṭul can ah ṭulbikmi a si.

Chin Pawlpi in himi Stadium saknak ding hrangah Committee an dinih cui Committee cun “Thang Tin Lian Hall” tiih hmin nei dingin an rel. Cutiih Pu Thang Tin Lian hmin hril a si nak cu Kawl le Mirang pawlin uktum ih kan Chinram an rak laktum khalah mahte ukawknak rak duh ih ralṭha zetih rak dodal ngamtu umsun, a uknak ram ah mi-uk dan thiam, ralṭha le mifim, uknak ram kaubik, tuu le fa zohṭhimtlak tampi sersuaktu a si ruangah a si, tiah Chin Pawlpi cun an sim.

Thang Tin Lian Memorial Hall Sak Ding Thu le Lailun ih Chin National Museum Sak Ding Thu Video ih Zoh duh hrang;

Pu Thang Tin Lian cu Falam peng Zahau ram le Hualngo ram rak uktu chief a si ih, khaw 92 rak uktu a si. Anih hi Kawl duhlo ih rak do zettu a si ih, 1947 ih Pinglong sa-chuk khal rak duhlo zettu a si. A Fapa Pu Zahre Lian khal Chin vuanzi tiang a rak ṭuantu a si ih kan Chinmi lakah Myanmar rampi aiawh ih UNO meeting rak kai hmaisabiktu khal a si. Hi Stadium saknak ding hrangah Australia Chin Community khalin nasa takin ṭan an tum thu khal theih a si.

Chinram Lailun Falam ah Chin National Museum sak thok zo thu,

Global Chin Organization (GCO) ih tawlrelnak in Laimipawl kan hminsin awknak bik a simi Lailun ah Chin National Museum cu sak dingin tawlrel a si ih atu ahcun an sak thok rero zo thu theih a si.

Hi Chin National Museum cu ara lai dingmi kum 2020 ih tuah dingmi Run Inn Tlun Kum ah onnak nei thei dingin timtuah reromi a si. Museum saknak dingih budget estimate cu Ting 5,000 a si ih, Innpi hi dot 3 ih sak ding a si. Asinan tuhrih ahcun Dot 1 tiang lawng sak hrih a si dingih cumi Dot 1 saknak le a sung thilripawl leinak hrangah Ting 1000 hrawng cu a cem ding tiih ruah a si.

Global Chin Organization (GCO) cu 2017 Run Inn Tlun Kum ih dinmi a si ih kum nauhakte si hman sehla leitlun kilkip ihsin lungrual zetih umtlangnak pawlkawm a si vekin hna tampi an ṭuan zo ih Falam No. 1 Hight School khal Rangva sii thar an thuh, General Hospital khal zun inn le lihawng pawl le a siatmi pawl remnak ah nasa takih ṭanla tu bik an si.

Hi Chin National Museum cu April 24, 2019 sunah thlacam ih nemhnget a si zo. Museum sungah hin Lai thuam, Lai thilri a phunphun a kimcang theibik dingin ret thluh a si ding tiah theih a si.

 




Be the first to comment

Leave a Reply

Your email address will not be published.


*