Ting 200 Hlo Thubuai ah Chin Cozah in A Heektu siseh Thuthang Ngantu khal Khing tum




A vei 69nak Chin National Day Puaipi Falam ih tuahmi ahlu ngahmi ting 200 thawn pehpar in Chin ramkulh cozah in lehrulsalnak an nei tum a si. Cuih thuthawn pehpar in thuhla phawrhsal in Eiruuk dodaltu commission hnen ih a heektu pathum le thuthang a ngantu Chin World thuthang cu khiingnak a nei tum tiah theih a si.

Hi thuthawn pehpar in April 8 zanlam ah Chin Ramkulh cozah ṭuanvonei in media pawl tawnkhawmnak a neihnak ah a sim a si. Minister U Soe Htet in, “Thuthang a dik lo zawngih  ngan in mi thangsiat duh phuahcop in thuthang ngantu Chin World media le Eiruknak dodalnak commission hnen ih heeknak a nei tu milai pathum pawl cu Chin ramkulh cozah in Upadi vekin khiingnak nei ding in kan timtuah. Hihi Chief Minister khal in ṭuanvo pek a si” tin a sim thu THP in a ngan.

Social Minister Pu Pau Lun Min Thang khal in, “Thuthang hi source pakhat lawng le ṭhaten hliakhlainak um loin Chin media nih thuthang nan ngan lo ding ah kan duh. Ram mipi hrangah thuthang dik thantu si ding ah ka duh” ti khalin a sim ve a si.

Hi tiih khiingnak an neihsal ding thuthawn pehpar in Chin World media Salai Hung Htun Gei cun, “Kan nih cu, Eiruuk dodalnak commission hnen ih an khiingmi ca kan nganmi a siih, kan mah lam cun a sualmi zianghman kan ngan mi a umlo. Ziangruangah in khiingtum timi cu; hi thu thawn pehpar in March 28 ni ah CM in Hakha post ah simfiangnak a rak nei zo, cumi kha CM in simfiangnak kan nei zomi ziang ruangah online ah a thleng sal tiah a thinheng, cumibik a si ko ding ka zum. March 28 ni Hakha post ih simfiangnak an nei mi cu Hakha ca in si tikah Chin ramkulh zate huap in an thei velo, kha mi pawl in eiruuk dodalnak hnen ih heeknak an nei mi cu March 30 ni ah a si. Cumi hnu an heeknak ca ka ngah ih April thla lam ah kan nih kan ngan mi a si, Hakha post ih simfiangnak an neihmi tla ka ngan tel cih ko, tuthang sual/kan duhduh ih nganmi zianghman a um lo.” tin a sim.

Eiruuk dodalnak hnen ih a heektu pathum pawl an khiingsal dingmi cu acang theimi a si ko tin khal a simbet a si. Hi thu cu, 2017 kum Avei 69nak Chin National Day, Falam Puaipi lai ah Htut Khaung Gyi company in Chin ramkulh cozah hnen ah ting 200 a rak hlu mi cu cohlannak ca siseh, hman salnak ca siseh zianghman a um nawnlo ruangah a hlo men tin an ruat ih Eiruuk dodalnak commission hnen Salai Mang Om, U Om Pai le Salai Boi Thang Khe hmin in heeknak an nei mi a si. Chinland Herald ta laksawngmi a si.

 




Be the first to comment

Leave a Reply

Your email address will not be published.


*