Mizansun ah Falam khawpi kiangih Vaar tivapi ah ah Falam peng Tualzeh khawmi nauhak pahnih, kum 13 le 14 mi cu tipi ah an tla tiah theih a si. Mizansun tiang ah hi nauhak pahnih ih ruak hi an hmu ngah thei loih tuisun May 22, 2019 lawngah nauhak pahnih ih ruak hi an hmu ngah thei tiah theih a si.

Vaar tipi ih tla thattu nauhak pahnih hi Pa Van Din Aung ih fapa Salai Lal Rin San (kum 13) le Pa Thawng El ih fapa Salai Van Nei Piang (kum 14) an si. Tipi ih an tlak dan cu, a tla thattu pahnih le San Te, kum 16, le a Pa Van Run Piang pawl cu Vaar tivapi ah Nga kai dingin an feh. An tlun lam ah Pu Van Run Piang cun nauhak pawl cu tileuh hmuh (piah) dingin a ti ih, cutin Ti a leuh lai ah nauhak pathum khal ti an rak leuh ve ih cutin hivekin vanduainak a ra cangmi a si.

Pu Van Run Piang hin nauhak pawl ti ah an tla ti a theih veten ava run ko nan, San Te lawng a va runsuak ngah ih a dang nauhak pahnih cu runsuak ngah thei loin Tipi ah an pil hlo ih hmuh theih an si nawnlo. Cutin Pu Van Run Piang cun nauhak pathum lakih a run ngahmi cu khawsung ah tlanpi cih in khawsung mipi pawl thuhla a sim hnu ah, K. Haimual, khawsen in a sim ih cutin khawsung upa minung 60 lenglo in Faar thing vang phah in khawthim tiang an hawl nan, mizan tiangah an hmu thei lo. K. Haimual khaw lal cun tui’ nauhak pawl an tlaknak hmun Tipi hi Tivirh a umnak hmun a si, tiah a sim.

Cutin mizan, zan simpi tiang an hawl nan an hmuh thei nawnlo hnu ah, tuizing ah hawl sunzawm a si ih, tuizing nazi 6AM le 8AM karlak ah nauhak pahnih ih ruak hi an hmu ngah theisal a si. Salai Van Nei Piang (kum 14) cu tuizing, zinglam nazi 6 hrawngah Tipi ih an tlaknak tawne ah an hmu ngah ih, Salai Lal Rin San (kum 13) cu an tlaknak kiangte ah amahte tipar ah a hung phuan aw ih cutin an hmu ngah tiah an sim.

Falam khawpi kiangih Vaar tivapi ah hin tubaite (May 1, 2019) khalah Falam nauhak mi pathum an rak tla that dah zo.

Tuiṭum ah hivekin ninghan riahsiat vanduai a tongtu sungkua pawl kan tuarpi in kan riahsiatpi zet a si. Mai’ fa duat te rori mai’ ṭaang pom loih mual an liam cu Nulepai’ hrangah ziangtluk tuar a naa ding. Tantami Nulepa sungkhat nunau zate hnen ah Pathian hnemnak thleng hram seh. Ref: Extract from Zalen.

 

LEAVE A REPLY

Please enter your comment!
Please enter your name here